Friday 11 October 2013

കഞ്ഞി പുരാണം



അതെ, കഞ്ഞി എനിക്കിഷ്ടമല്ല...!!
കഞ്ഞിപ്രിയയായ ഭാര്യയോടു അതിനു കലഹിക്കും.
കഴിയുമെങ്കിൽ വെള്ളം ഊറ്റിക്കളഞ്ഞ് ചോറാക്കി ഞാൻ കഴിക്കും.
.
.
തൊണ്ണൂറുകളുടെ തുടക്കത്തിൽ ആദ്യമായി ഒരു ജോലി കിട്ടിയാണ് തിര്വോന്തപുരത്ത് എത്തുന്നത്.സെക്രെട്ടറിയെറ്റിന്റെ പരിസരത്ത് ഒരു ലോഡ്ജിൽ കുടികയറി. കൂട്ടത്തിൽ സഹമുറിയന്മാരായി നിലമേൽകാരനായ ഒരു നസീമുദ്ദീനും ഞങ്ങൾക്ക് മുൻപേ തന്നെ വന്ന കുറെ മൂട്ടകളും.

ഗാന്ധാരിയമ്മൻ കോവിലിനു സമീപം ഒരു ഗുരുവായൂരപ്പൻ ഹോട്ടൽ ഉണ്ട്.അവിടെ രാത്രിയിൽ നല്ല ഒന്നാന്തരം കഞ്ഞി കിട്ടും.പയർ, പപ്പടം, തൊടുകറി, അച്ചാറ്...
ഗുരുവായൂരപ്പൻ ഹോട്ടലിലെ ഈ കഞ്ഞിഭോജനം പണ്ട് മുതൽക്കേ പ്രശസ്തമാണ്. എ പി ജെ അബ്ദുൾ കലാം പണ്ട് തിരുവനന്തപുരത്ത് താമസമായിരുന കാലത്ത് എന്നും രാത്രി കഞ്ഞി കുടിക്കാൻ ഗുരുവായൂരപ്പൻ ഹോട്ടലിൽ എത്താറുണ്ടായിരുന്നു.

എന്നും രാത്രിയാകുമ്പോൾ നസിമുമൊത്ത് കഞ്ഞി കുടിക്കാൻ ഗുരുവായൂരപ്പൻ ഹോട്ടലിൽ എത്തും. വലിയതിരക്കാണ്. കാത്തു നില്ക്കണം.
എന്നാലും സാരമില്ല. എ പീ ജെ യുടെ കഞ്ഞിക്കടയല്ലേ..കാത്തു നിന്ന് കഞ്ഞി കുടിക്കും.

കഞ്ഞി തന്നെ രണ്ടു തരമുണ്ട്. സാദാ കഞ്ഞിയും സ്പെഷ്യൽ കഞ്ഞിയും.
സ്പെഷ്യൽ കഞ്ഞിയിൽ തൊടുകറി വകഭേദം കൂടും. കഞ്ഞിപ്രിയനായ നസിം എന്നും സ്പെഷ്യൽ കഞ്ഞിയെ കുടിക്കൂ..
വിളമ്പുന്ന പയ്യൻ പാത്രത്തിൽ കഞ്ഞി തീരുന്ന മുറക്ക് വീണ്ടും വീണ്ടും കഞ്ഞി പകർന്നു കൊണ്ടേയിരിക്കും. മതി എന്ന് പറയും വരെ.

കഞ്ഞിയും കുടിച്ചു വയറും തടവി ഒരു ഏമ്പക്കവും വിട്ട് പുറത്തേക്ക് വരുമ്പോൾ ക്യാഷ്കൌണ്ടറിൽ ഇരിക്കുന്ന മുതലാളി ചിരിച്ചു കൊണ്ട് സുഖാന്വേഷണം നടത്തും. വിളമ്പു പയ്യൻ ബിൽ തുക വിളിച്ചു പറയും.

അങ്ങനെയിരിക്കുന്ന കാലത്താണ് ആ ഭയങ്കര സംഭവം ഉണ്ടാകുന്നത്.

പതിവുപോലെ കഞ്ഞി കുടിച്ചു നിർവ്രുതിയോടെ പുറത്തേക്ക് ഇറങ്ങി വരികയാണ്.
നസ്സിമാണ് ക്യാഷ് കൌണ്ടറിന് മുൻപിൽ ആദ്യമെത്തിയത്‌. മുതലാളി പതിവ് പോലെ കുശലാന്വേഷണം നടത്തി.

അപ്പോൾ അകത്തു നിന്നും വിളമ്പു പയ്യന്റെ അശരീരി മുഴങ്ങി.
"മുൻപേ വരുന്ന സാർ സ്പെഷ്യൽ കഞ്ഞി..!!

ഈയുള്ളവൻ നസ്സിമിന്റെ പുറകിൽ  നിന്ന് ഗുരുവയ്യൂരപ്പൻ ഹോട്ടലിന്റെ മേല്ക്കൂര ഇളകുമാറ്‌ ഉറക്കെച്ചിരിച്ചു..

തൊട്ടുപുറകെ വന്നു, അടുത്ത അശരീരി..
"പുറകെ വരുന്ന സാർ വെറും കഞ്ഞി..!! "
.
.
അതെ, കഞ്ഞി എനിക്കിഷ്ടമല്ല...!!
കഞ്ഞിപ്രിയയായ ഭാര്യയോടു അതിനു കലഹിക്കും.
കഴിയുമെങ്കിൽ വെള്ളം ഊറ്റിക്കളഞ്ഞ് ചോറാക്കി ഞാൻ കഴിക്കും.
എ പീ ജെ യോടുള്ള ദേഷ്യം ഈയിടെയാണ് തീർന്നത്.

No comments:

Post a Comment