രണ്ടാം വരവ്.

രണ്ടാം വരവ്

ഊർമിളെ, 

നിന്റെ  ദേവനിതാ മടങ്ങിയെത്തിയിരിക്കുന്നു... 

ഊർമിളെ, 

നിന്റെ  ദേവനിതാ മടങ്ങിയെത്തിയിരിക്കുന്നു... 

മായാമൃഗങ്ങൾ നിറഞ്ഞ കാനനഗർഭങ്ങളിൽ 

അസുരപുത്രിയുടെ കാമം നിറഞ്ഞ കണ്‍കളിൽ 

യുദ്ധക്കളത്തിലെ രക്തപ്പുഴകളിൽ 

മേഘനാദന്റെ ശരങ്ങളിൽ 

എവിടെയും എവിടെയും 

കളഞ്ഞിടാത്ത  മനവുമായ് 

സ്നേഹവുമായ് 

ഊർമിളെ, 

നിന്റെ  ദേവനിതാ മടങ്ങിയെത്തിയിരിക്കുന്നു... 

ഒരു രണ്ടാം വരവ്..

ഇനി,

ഇരുളടഞ്ഞ കിടക്കറയിലെ 

കണ്ണീരിലുറഞ്ഞ സ്വപ്നങ്ങളില്ല.

ചുവന്ന കണ്ണുകളാൽ ചുവന്ന കണ്ണുകളിൽ നോക്കി 

തത്തമ്മയോടടക്കം പറഞ്ഞു കരയേണ്ടതില്ല.

ജാലകപ്പാളികൾക്കിടയിലൂടെ നീളും 

മോഹങ്ങൾ  തൻ കുത്തൊഴുക്കില്ല.. .

ഇനി,

മോഹങ്ങളില്ല, മോഹഭംഗങ്ങളുമില്ല.

ഊർമിളെ, 

നിന്റെ  ദേവനിതാ മടങ്ങിയെത്തിയിരിക്കുന്നു... 

ഒരു രണ്ടാം വരവ്..

മൌനമുറയും നിൻ  ശയ്യാഗൃഹത്തിൻ 

വാതിൽപ്പാളികൾ മെല്ലെത്തുറന്ന് 

മന്ദമാരുതൻ തൻ കയ്യാൽ തുടിക്കും 

പട്ടുതിരശീലകൾ മാടിയൊതുക്കിയും 

നെഞ്ചിടിപ്പിൻ തീവ്രസംഗീതമിന്നൊരു 

വീർപ്പുമുട്ടലിൽ സ്വയം പിടിച്ചുലച്ചും  

നിന്റെ ദേവനിതാ നിന്നെത്തിരയുന്നു..

ഇതൊരു ലക്ഷ്മണകാണ്ഠം.

ഊർമിളെ, 

നിന്റെ  ദേവനിതാ മടങ്ങിയെത്തിയിരിക്കുന്നു... 

എന്തേ ഊർമിളെ, 

എന്തേ ഊർമിളെ  ഈ മൗനം?